Hi, main hoon Adarsh Pandey.

Aur jo website aap abhi padh rahe hain, woh koi portfolio nahi hai. Na hi yeh self marketing ke liye banayi gayi hai. Internet par waise bhi log apni sabse acchi photo, sabse badi achievement aur sabse impressive version dikhate hain. Mujhe us race ka hissa banne ka kabhi mann nahi hua. Mujhe laga agar kabhi apni kahani likhni hai, to waise likhni chahiye jaise woh sach mein thi.

Yeh page kisi recruiter ke liye nahi hai.

Na hi kisi company ke liye.

Yeh page future wale Adarsh ke liye hai.

Main chahta hoon ki agar aaj se bees ya tees saal baad kabhi is page par dobara aaun, to har paragraph ke saath koi memory wapas aa jaaye. Woh raat yaad aa jaaye jab ek chhota sa bug fix karne ke baad lag raha tha ki maine duniya jeet li hai. Woh din yaad aa jaaye jab maine apni pehli website bana kar bina kisi wajah ke khud hi baar baar refresh ki thi. Woh galtiyan yaad aa jaayen jin par us waqt bahut gussa aaya tha aur aaj unhe yaad karke hasi aati hai. Shayad isi liye mujhe likhna pasand hai. Yaadein waqt ke saath dhundhli ho jaati hain, lekin lafzon mein woh bahut der tak zinda rehti hain.

Aur waise bhi, Iron Man mera favourite character hai, toh thodi si dramebaazi toh banti hi hai.

Main aaj third semester mein hoon. GATE ki taiyaari ho rahi hai, pressure hai, competition bahut hai. Log IIT se passout hoke Google chhod kar waapas GATE de rahe hain, AIIMS Delhi se MBBS karne wale bhi meri seat ke liye compete kar rahe hain. Par main is baar apne aap ko pehle se alag tarah se dekh raha hoon. Shayad isliye ki maine apni kahani ko dobara jeeya hai, is page ke zariye. Aur kahani jab dobara jeete ho, toh pata chalta hai ki tum kis mitti se bane ho.

Bachpan mein mujhe space se pyaar tha. Apollo missions, Neil Armstrong, Chandrayaan... main ghanto baith kar unke baare mein padhta tha. Mere liye space sirf planets aur stars ka collection nahi tha. Woh curiosity ka doosra naam tha. Jitna universe ko samajhne ki koshish karte ho, utna hi ehsaas hota hai ki hum kitna kam jaante hain. Isi curiosity ne dheere dheere mujhe technology ki taraf dhakela. Main NPTEL se Quantum Mechanics aur Nuclear Astrophysics jaise courses bhi kar leta tha, sirf isliye ki jo fascination hai woh sirf imagination tak limited na rahe. Uske peeche ka science bhi samajh aa jaaye.

2020 mein maine apni pehli website banayi. Naam rakha Starlink. Haan, Elon Musk wale se inspire hokar. WordPress par host thi, aur us par main science aur space se related articles likhta tha. General Relativity, Quantum Mechanics, Particle Wave Duality... topics itne fascinating lagte the ki main pehle khud detail mein samajhta, references verify karta, phir likhta, phir dobara likhta. Har article ek chhota research project tha. Ek article mein kabhi kabhi ek mahina lag jaata tha. Phir 10th board aa gaye, pressure badha, aur maine Starlink delete kar di. Aaj bhi jab sochta hoon toh lagta hai, kaash na kiya hota. Woh meri life ki sabse badi galtiyon mein se ek thi.

2021-22 ke aas paas meri actual tech journey shuru hui. Computer se rishta isse bhi pehle ka tha, 2017-18 mein main free computer classes sirf AC ki thandi hawa khane jaata tha, lekin wahi se C, HTML, CSS aur JavaScript ke basics seekh liye. 2022 mein maine Blogger par TechVision AI aur TechVision Cloud banayi. Baad mein Cloud wali delete kar di kyunki dono ka content almost same tha. Science aur technology mere liye kabhi alag nahi rahe. Dono hamesha ek hi kahani ke do chapters lage.

Artificial Intelligence mere liye ChatGPT ke baad discover hua topic nahi tha. Main uske baare mein usse kaafi pehle se padh raha tha. Transformers, Google LaMDA, Machine Learning, Neural Networks... maine ChatGPT launch hone se pehle hi detailed articles likhne shuru kar diye the. Mera simple rule tha ki main kabhi chhote articles nahi likhta. Har topic ko chapters mein divide karta. Aaj jab un purane articles ko dekhta hoon, toh satisfaction milti hai kyunki unmein likhi bahut si baatein aur predictions baad mein sach sabit hui. Woh blog TechVision AI, jahan maine attention mechanisms, quantum computing, aur LaMDA ke baare mein likha, mera apna ek chhota sa corner tha internet par. Shayad bahut kam log padhte the, par us corner mein main apni deepest curiosities ko explore kar sakta tha.

Academics mein main shuru se accha tha. 95% ka benchmark set karke rakha tha ki isse neeche na jaaye. 10th aur 12th science stream wahi do instances hain jahan 90% se kam aaye, par uska reason lack of interest nahi balki doosre kaamon mein zyada dhyan dena tha. 12th ke baad Cadence ki scholarship mili. Yeh mere liye sirf ek certificate nahi thi. Pehli baar laga ki shayad jo cheezein main raat bhar baithkar padh raha tha, unka koi matlab bhi tha. Kisi ne unhe notice kiya tha. Iske baad BSC IT mein admission liya, 86% average ke saath complete kiya, specialisation cloud and application development mein.

Scholarship milne ke baad maine decide kiya ki main simultaneously AI bhi seekhunga. MIT, Stanford, NPTEL, IIT ke courses se basic to advanced ML, intermediate deep learning, NLP, reinforcement learning, transformers... sab kuch. Sirf curiosity aur fun ke liye. Isse pehle maine cybersecurity aur hacking bhi explore kar liya tha. Par AI ne mujhe ek alag hi level par attract kiya.

2024 aur 2025 woh saal the jab maine actual mein jo seekha tha use apply karna shuru kiya. 150 se zyada real websites deploy ki, lagbhag har latest SOTA pe kaam kiya, bahut saare experiments kiye. Mera goal latest SOTA tech pe kaam karna tha, jo shayad hi India ke colleges mein kahi kabhi padhaya jaata ho.

DeepSeek R1 ka launch mere liye special tha. Varna shayad hi main kuch special projects kar paata. Jaise AgenticSeek, jo maine apni bhasha mein Jarvis+ ka naam diya. Iron Man ka fan tha, isliye apne model ka naam Jarvis rakhna almost obvious tha. Pehli baar jab woh mere machine par theek se response dene laga, toh excitement us model ke answers se zyada is baat ki thi ki maine usse khud banaya tha. Baad mein usse kaafi time tak host bhi kiya. Kai baar woh bina wajah crash hota tha, kai baar main khud usse tod deta tha sirf ye dekhne ke liye ki uske andar aur kya improve kiya ja sakta hai. AgenticSeek ko 25k se zyada stars mile, aur open source community mein pehchan mili, jo mere liye bahut fulfilling raha. Iske alawa aur bhi open source repositories pe kaam kiya. Hackathons mein cloud credits jeete, research grants mile, 22k dollars worth credits, premium accounts, security bugs find karne par dollars bhi mile. Bahut drama, bahut hero giri, aur bahut kuch seekha.

Bachelors khatam hone ke baad AI field mein masters karna obvious choice tha. Par IIT jaana bhi ek dream tha. Maine decide kiya ki ab GATE pe focus karunga. First year mein maine apne aap ko pressure mein daalne ki koshish ki. Sirf ek din mein jitna ho paaye utna padho, maximum pressure mein kaam karo. Careless approach. Bich bich mein heartbreaks bhi liye. Internal ka ek paper dena bhool gaya. External mein alag subject ka paper tha aur main alag subject padh raha tha. Par isne mujhe waapas seriousness laane ka mauka diya. Aur pressure mein kaam karne ki technique ko samajhne ka bhi.

Ab main third sem mein hoon. GATE ka weightage zyada hai. Par main is baar apne aap ko pehle se zyada samajhta hoon.

Aage kya hoga, mujhe nahi pata.

Ho sakta hai inmein se aadhe ideas kabhi poore hi na ho. Ho sakta hai kuch projects fail ho jaayein. Ho sakta hai kuch aise ban jaayein jinke baare mein aaj main soch bhi nahi sakta. Lekin ek cheez main apne baare mein jaanta hoon. Mujhe hamesha naye ideas ke peeche bhaagna pasand raha hai.

Kabhi ek AI model train karne ka mann karta hai, to kabhi poori raat kisi research paper ko samajhne mein nikal jaati hai. Kabhi kisi open source repository mein contribution karne ka excitement hota hai, to kabhi kisi ajeeb se experiment ke liye poora weekend kharab kar deta hoon. Kai projects kabhi complete nahi hue, kai sirf mere laptop tak hi simit rahe, aur kuch internet tak pahunch gaye. Lekin shayad unmein se kisi ka bhi sabse important hissa result nahi tha. Sabse important hissa woh process tha jisme har baar kuch naya seekhne ko mila.

Ek sapna zaroor hai jo kaafi saalon se mere saath chal raha hai.

Space aur Artificial Intelligence ko ek saath laane ka.

Main hamesha imagine karta hoon ki ek din aisa system banaun jo sirf commands follow na kare, balki khud observe kare, seekhe aur space ke baare mein naye tareeke se knowledge collect aur organise kare. Shayad woh kabhi banega, shayad uska naam bhi badal jaayega, aur shayad woh meri imagination se bilkul alag niklega. Mujhe nahi pata.

Lekin sapne agar pehle se hi poori tarah samajh aa jaayein, to shayad woh sapne nahi, plans hote hain.

Aur meri life hamesha plans se zyada curiosity par chali hai.

Aaj main bas itna jaanta hoon ki mujhe seekhte rehna hai. Space ke baare mein. Artificial Intelligence ke baare mein. Aur sabse zyada, khud ke baare mein.

Baaki kahani...

Woh abhi likhi ja rahi hai.

Agar bees ya tees saal baad future wala Adarsh yahan tak pahuncha hai, to umeed hai ki uske andar ka woh curious bachcha abhi bhi zinda hoga.

Agar woh curious bachcha abhi bhi zinda hai, to samajh lena ki hum jeet gaye.